توێژینەوەیەک لەبارەی کاریگەریی هەنگ لەسەر زەوییە کشتوکاڵییەکان کراوە و سەلماندوویەتی کە کەمبوونەوەی هەنگ، دەبێتە هۆی کورتهێنانی و سنوورداربوونی بەرهەمە خۆراکییە سەرەکییەکان.
ئیکۆلۆجیست و پسپۆڕی بواری پەڕینی ڕووەکەکان لە زانکۆی ڕوتگەرز، ڕەیچڵ وینفری بە ڕۆژنامەکەی وت، “ئەو کشتوکاڵەی هەنگی زیاتریان بەسەرەوەیە بەرهەمی زیاتریان دەبێت. سەرم سوڕما، پێشبینیم نەکرد هەنگ تاوەکو ئەو ڕادەیە سنوور بۆ بەرهەمی کشتوکاڵ دابنێت”.
لە چوارچێوەی توێژینەوەکەدا، حەوت لێکۆڵینەوە لەسەر زەویی کشتوکاڵی 13 ویلایەت ئەنجامدراوە، پێنجیان ئەوەی سەلماندووە کە نەبوونی هەنگ، بڕی بەرهەمی ژمارەیەک درەختی کەمکردووەتەوە، لەوانەش دارسێو، دارگێلاس و دارتوتڕک.
بەپێی ڕاپۆرتێکی ڕێکخراوی خۆراک و کشتوکاڵی سەر بە نەتەوە یەکگرتووەکان لە 50 ساڵی ڕابردوودا، بڕی ئەو بەرهەمە کشتوکاڵییانەی پشت بە مێروو و پەڕێنەرەکان دەبەستن، بە ڕێژەی لە سەدا 300 زیادیکردووە.
وینفری ئاماژەی بەوە کرد کە کۆلۆنیی هەنگەمێشەکان بەراورد بە ڕابردوو، لاوازتربوون و هەنگە کێوییەکانیش کەمبوونەتەوە. “کشتوکاڵ چڕتردەبێتەوە و هەنگی کەمتریش لە ناوچەکەدا ئامادەییان دەبێت، ئەمەش لە هەندێک حاڵەتدا پەڕین سنوورداردەکات”.
