بەبڕیاری فیدراسیۆنی تۆپی پێی عێراق، زیلیکۆ پترۆڤیچ، ڕاهێنەری هەڵبژاردەی عێراق لە پۆستەکەی دوورخرایەوە، ئەوەش بەهۆی ئەنجامە خراپەکانی لە پاڵاوتنەکانی کیشوەری ئاسیا بۆ گەیشتن بە مۆندیالی قەتەر.
لە ڕاگەیاندراوێکدا فیدراسیۆنی تۆپی پێی عێراق نووسیویەتی، “فیدراسیۆنی عێراق، بە ئامادەبوونی عەدنان درجال وەزیری وەرزش و لاوان، هەروەها جێگری یەکەمی سەرۆکی فیدراسیۆنی تۆپی پێ، عەلی جەبار و جێگری دووەم، یونس مەحمود و ئەندامانی ئەنجومەنی جێبەجێکار کۆبوونەوەیەکی ئەنجامدا، لە کۆبوونەوەکەدا چەند بڕیارێک دەرکران، یەکێک لەوانە دوورخستنەوەی زیلیکۆ پیترۆڤیچ بوو لە پۆستی ڕاهێنەری هەڵبژاردەی عێراق”.
هەروەها نووسراوە، “لە چەند هەفتەی داهاتوودا ڕاهێنەرێکی عێراقی بۆ هەڵبژاردەی نیشتمانی دەستنیشاندەکەین، هەروەها لیژنەیەکی ئەکادیمی لە کەسانی پسپۆر پێکدەهێنین بۆ داڕشتنی ستراتیژێکی نوێ و کاریگەر، بە جۆریک ئاستی هەڵبژاردەی نیشتمانی بەرزبکاتەوە”.
هەڵبژاردەی عێراق لە قۆناغی سێیەمی پاڵاوتنەکانی ئاسیا بۆ مۆندیالی 2022ی قەتەر، هەشت ڕووبەڕووبوونەوەی ئەنجامداوە، پێنج یەکسانبوون و سێ دۆڕاندنی تۆمارکردووە، بە پێنج خاڵەوە کەوتووەتە پلەی پێنجەمی کۆمەڵەی یەکەم لە کۆی شەش هەڵبژاردە.
