برای ژنێکی خەڵکی دهۆک، داوا لە لایەنە پەیوەندیدارەکان دەکات، هاوکارییان بکەن چونکە ماوەی چەند مانگێکە خوشکەکەی لە وڵاتی لیوانیا لەژێر چاودێری چردایە و بە هۆکاری چەند ئامێرێک لە ژیاندا ماوە.
برای ئەو ژنە دهۆکییە ڕایدەگەیەنێت، “حکومەتی لیتوانیا پێیان وتووین ئێمە ناتوانین چارەسەری پێویستی بۆ بکەین، چونکە ئەو هاوڵاتی لیتوانی نییە و تەنها دەتوانن هاوکاریی سەرەتایی بکەن”.
بە وتەی برای ئەو ژنە، ئەوان وەک کەسوکارەکەی چوار خوشک و برایەکیان لەدەستداوە و نایانەوێت ئەم کەسەش لەدەست بدەن، بەڵام هیچ شتێکیان لەدەستنایەت و ئەوە لە توانای حکومەتدایە.
بەشێک لەو کۆچبەرانەی لە بیلاڕوسیاوە هەوڵیاندا بگەنە ئەوروپا، چوونە وڵاتی لیتوانیا و لەوێ گیریانخواردووە، ئەمساڵیش وەزیری دەرەوەی لیتوانیا سەردانی هەولێری کرد و لەسەر گەڕانەوەی ئەو کۆچبەرانە لەگەڵ بەرپرسانی هەرێم گفتوگۆی کرد.
