دوو كرێكاری سووری، كە لە سنووری دەربەندیخان كاردەكەن، خەڵوزیان بۆ خۆگەرمكردنەوە بەكارهێناوە و یەكێكیان گیانیلەدەستداوە.
سامان شێخ لەتیف، بەڕێوەبەری ڕاگەیاندنی تەندروستیی سلێمانی بۆ تۆڕی میدیایی ئێستای ڕاگەیاند، ئەمشەو دوو كرێكاری بە ڕەگەز سووری، كە لە كارگەیەكی چەو و لمی گوندی دەرەدۆیین-ی سنووری دەربەندیخان كاریانكردووە، بەهۆی دووكەڵی خەڵووزەوە، كە بۆ خۆگەرمكردنەوە بەكاریانهێناوە، تووشی تەنگەنەفەسی بوون.
بەڕێوەبەری ڕاگەیاندنی تەندروستیی سلێمانی ئاشكراشیكرد، یەكێك لە كرێكارەكان بەوهۆیەوە گیانیلەدەستداوە و ئەوەی دیكەیان گەیەندراوەتە نەخۆشخانەی شار لە سلێمانی و تەندروستیی ناجێگیرە.
