پەرلەمانی كوردستان لە دانیشتنی ئەمڕۆیدا پڕۆژەیاسای “سەرپەرشتیكردنی پڕۆژە كشتوكاڵییەكان”ی پەسەندكرد، سەرۆكی لیژنەی كشتوكاڵ دەڵێت، یاساكە زیاتر لە پێنج هەزار هەلی كار دەڕەخسێنێت.
لە دانیشتنی ئەمڕۆیدا پەرلەمانی كوردستان بە دەنگی 95 ئەندام پڕۆژەیاسای “سەرپەرشتیکردنی پڕۆژە کشتوکاڵییەکان”ی پەسەندكرد.
عەبدولستار مەجید، سەرۆکی لیژنەی کشتوکاڵ و ئاودێریی پەرلەمانی کوردستان ڕایگەیاند، “ئەمە یەکێکە لەو دەستکەوتە گەورانەی ماوەیەکی زۆر پێوەیان ماندووبووین کە سوپاس بۆ خوا ئەنجامی باشی هەبوو و پەسەندکرا”.
بە وتەی سەرۆكی لیژنەكە بە کەوتنەکاری ئەم یاسایە، زیاتر لە پێنج هەزار هەلی کار بۆ دەرچووانی كۆلێج و پەیمانگا کشتوکاڵییەکان دەڕەخسێنێت بەو مەرجەی لە کەرتی گشتی دانەمەزرابێت.
