بە بڕیاری بافڵ جەلال تاڵەبانی هەردوو مەكتەبی سكرتاریەت و مەكتەبی تەنفیزیی كۆمەڵەی خوێندكاران و چالاكییەكانی ڕێكخراوەكە هەڵپەسێردران.
بافڵ جەلال تاڵەبانی بڕیاریدا بە ھەڵپەساردنی مەکتەبی سکرتاریەت و مەکتەبی تەنفیزیی کۆمەڵەی خوێندکارانی کوردستان و سەرجەم کار و چالاكییەكانی ڕێكخراوەكە.
بەپێی ڕاگەیەندراوێكی نوسینگەكەی هەڵپەساردنەكە تاوەکو ھەڵبژاردن بۆ دەستەیەکی نوێی کۆمەڵەی خوێندکاران دەبێت کە “لەخزمەت داخوازی و خواست و بەدیھێنانی مافی خوێندکارانی کوردستان بن”.
بڕیارەكە لەكاتێكدایە لەماوەی هەفتەیەكدا بافڵ جەلال تاڵەبانی دوو كۆبوونەوەی لەگەڵ نوێنەرانی خوێندكارانی زانكۆكانی سنووری سلێمانی، هەڵەبجە، گەرمیان و ڕاپەرین ئەنجامدا، كە یەكەمیان هەشت كاتژمێر و دووەمیان 12 كاتژمێری خایاند و تیایاندا بەڵێنی پێدان گرفت و داواكارییەكانیان چارەسەر بكات.
ڕۆژی شەممەش بڵاوكرایەوە، كە بەشێك لە یارمەتییەكانی بافڵ جەلال تاڵەبانی گەیەندرایە زانكۆی سلێمانی و بەشە ناوخۆییەكانی، گەیشتنی یارمەتی و پێداویستییەكانیش بۆ زانكۆ و پەیمانگاكانی دیكە بەردەوام دەبێت.
