جارێکی دیکە تاران سووربوونی لەسەر مەرجەکانی وڵاتەکەی بۆ دەستپێکردنەوەی دانوستانەکانی دۆسیەی ئەتۆمی و گەڕانەوە بۆ ڕێککەوتنی ئەتۆمی ڕاگەیاند.
ئەمیر عەبدوللهیان وەزیری دەرەوەی کۆماری ئیسلامیی ئێران ڕایگەیاند، “نامانەوێت لەسەر ئەو ڕێگە داخراوە بمێنینەوە کە گفتوگۆکانی دۆسیەی ئەتۆمی لە پێشوودا پێیگەیشتووە”.
ئاماژەی بۆئەوەشکرد، ئەگەر لایەنی بەرامبەر بەشێوەیەکی جددی و ئەرێنی بەشداریی گفتوگۆکان بکات، دەکرێت لەماوەیەکی کەمدا بەگەنە ڕێککەوتنێکی باش.
وتیشی، بۆ گەیشتن بەڕێککەوتنێکی باش دەبێت ئەمریکا سزاکانی سەر ئێران هەڵگرێت و گرەنتی مانەوە و دووبارە نەکشانەوەی لە ڕێککەوتنی ئەتۆمی بدات.
بەرلە چەند ڕۆژێک وەزیری دەرەوەی ئێران ئاشکرایکرد وڵاتەکەی دەیەوێت بگەڕێتەوە بۆ گفتوگۆکان و گەیشتن بە ڕێککەوتن هەروەها گەڕانەوە و پابەندبوونی هەموو لایەنەکانی بە گرنگ و پێیوست بۆ گەیشتن بەڕێککەوتن دانا.
