كۆشكی سپی ئەمڕۆ یەکشەممە ڕاگەیەندراوێكی بڵاوكردەوە و ڕایگەیاند، جۆ بایدن سەرۆکی ئەمریکا لەگەڵ ڕەجەب تەیب ئەردۆغان سەرۆک کۆماری تورکیا لە پەراوێزی لوتکەی G20 لە ڕۆما کۆبووەتەوە.
بەپێی ڕاگەیەندراوەكە، بایدن جەختیكردووەتەوە لە درێژەدان بە “پەیوەندیی بنیادنەرانە لەنێوان ئەمریكا و تورکیا و فراوانكردنی بوارەكانی هاوكاری و چارەسەركردنی ناكۆكییەكان بەشێوەیەكی كارا”.
سەرۆكی ئەمریكا پێزانینی دەربڕیوە لەپای بەشداریكردنی توركیا بۆ ماوەی دوو دەیە لە چالاكییەكانی ناتۆ لە ئەفغانستان و جەختیكردووەتەوە لە هاوبەشیی توركیا و ئەمریكا لە بواری بەرگریدا، لەهەمانكاتدا نیگەرانییەکانی وڵاتەکەی لەبارەی بەدەستخستنی سیستمی ئێس 400ـی ڕوسی لەلایەن تورکیاوە گەیاندووە بە ئەردۆغان”.
كۆشكی سپی لە ڕاگەیەندراوەكەیدا دەڵێت، “هەردوو سەرۆك، پرۆسەی سیاسیی سوریا و گەیاندنی هاوكاری بە ئەفغانییەكان و هەڵبژاردن لە لیبیا و بارودۆخی خۆرهەڵاتی دەریای ناوەڕاست و هەوڵە دیپلۆماسییەکانی باشووری قەوقازیان تاوتوێکردووە”.
لە كۆبوونەوەكەی هەردوو سەرۆكی ئەمریكا و توركیادا، جۆ بایدن جەختیكردووەتەوە لە “گرنگیی بوونی دامەزراوەی دیموکراسیی بەهێز لە توركیا، ڕێزگرتن لە مافەکانی مرۆڤ و سەروەریی یاسا لەپێناو ئاشتی و خۆشگوزەرانیدا” وەك ڕاگەیەندراوەكەی كۆشكی سپی ئاشكرایكردووە.
دیدارەكەی هەردوو سەرۆكی ئەمریكا و توركیا دوای ئەوە دێت كە پەیوەندییەكانی ئەو دوو وڵاتە بەمدواییانە بە گرژیدا تێپەڕین، هۆكارەكەشی ناكۆكیی نێوانیانە لەبارەی سوریا و كڕینی سیستمی ئێس 400ـی ڕوسی لەلایەن تورکیاوە، هەروەها پرسی مافی مرۆڤ لەو وڵاتەدا كە ئەمریكا لێینیگەرانە.
