میدیاکانی ئەمریکا ئاشکرایان کردووە، یەکێک لەو موشەکانەی کە ئێران ئاڕاستەی زەریای هیندی کردووە، 100 مایل لە نزیک کەشتیی سەربازیی نیمیتز تەقیووەتەوە.
بەپێی زانیاریی میدیا ئەمریکییەکان موشەکێکی دیکەی ئێرانی لە نزیک کەشتییەکی بازرگانی لە ئاوی زەریای هیندیدا تەقیوەتەوە.
ئەمڕۆ 16ی کانونی دووەم، فەرماندەی سوپای پاسدارانی ئێران ڕایگەیاند، چەندین موشەکی بالیستییان لە زەریای هیندیدا تەقاندووەتەوە، بۆ ڕێگرییکردن لەو هەڕەشانەی ڕوبەڕووی ئێران دەبنەوە.
حسێن سەلامی، فەرماندەی سوپای پاسدارانی ئێران لە دووەم ڕۆژی مانۆڕی سەربازیی “پەیامبەری ئیسلام” ڕایگەیاند، “ئەمە قۆناغی کۆتایی مانۆڕە سەربازییەکەیە و توانیمان چەندین موشەکی بالیستی لە زەریای هیندیدا بە سەرکەوتوویی بتەقێنینەوە، کە دەتوانێت وەڵامێک بێت بۆ هەموو ئەو هەڕەشانەی لە دەوروبەری ئێراندا هەن”.
فەرماندەی سوپای پاسداران، ئاماژەی بەوەشکردووە، موشەکە بالیستییەکان دەتوانن لە سیستمی بەرگریی وڵاتانی نزیک لە ئێرانیش تێپەڕێت.
ئاژانسە هەواڵییەکانی ئێران ئاشکرایان کردووە، لە دوێنێ هەینی 15ی کانونی دووەمەوە، ئامادەکارییەکان بۆ تاقیکردنەوەی دەیان موشەکی بالیستی و کیشوەربڕ دەستیان پێکردووە و مانۆڕەکە لە ناوچەیەکی بیابانی دوور لە شوێنی نیشتەجێبوون ئەنجام دەدرێت.
