ئیدارەی یانەی بەرشلۆنە فشاری توندی لەسەر عوسمان دێمبیلی-ی فەرەنسی دروستکردووە بۆ نوێکردنەوەی بۆندەکەی.
بەپێی زانیارییەکانی ڕۆژنامەی موندۆ دیپۆرتیڤۆ، چەند مانگێکە بەڕێوەبەرانی ئازولگرانا هەوڵەکانیان بۆ نوێکردنەوەی بۆندی دێمبیلی دەستپێکردووە.
لێپرسراوی کاروباری یاریزانەکە ئامۆژگاری کردووە، بە ئۆفەرەکانی ئیدارەی خوان لاپۆرتا قایلبێت و گرێبەستەکەی تاوەکو چوار وەرزی دیکە نوێبکاتەوە، بەڵام یاریزانەکە تاوەکو ئەم ساتە وەڵامێکی یەکلاکەرەوەی نەبووە.
سەرچاوەکە نووسیویەتی، ستافی کارگێڕیی بارسا دواپەیامیان ئاڕاستەی ڕەشئەسمەرە فەرەنسییەکە کردووە، دووپاتیانکردووەتەوە، ئەگەر بە ئۆفەرە نوێیەکان قایلنەبێت و بۆندەکەی نوێنەکاتەوە، لەم وەرزەدا هیچ چانسێکی یاریکردنی پێنادرێت.
دێمبیلی لە هاوینی 2022 بۆندەکەی لەگەڵ بارسا کۆتاییدێت، یانەکانی مانچستەر یونایتد و لیڤەرپوڵ خواستیان لەسەر گواستنەوەی نیشانداوە و ئامادەن داواکاری و مەرجەکانی جێبەجێبکەن، بەو مەرجەی لە میرکاتۆی هاوینی 2022 بێبەرامبەر پەیوەندییان پێوەبکات.
