فڕۆکەخانەى نێودەوڵەتیی سلێمانى لە ڕاگەیەندراوێكدا ئاشكراكردنی ساختەكاریی گروپێكی گەشتیاری ڕاگەیاند، ویستراوە 24 گەشتیار، كە بەڵگەنامەكانیان فەرمی نەبوون، بگوازرێنەوە بۆ دۆسلدۆرف-ی ئەڵمانیا.
فڕۆكەخانەی سلێمانی لە ڕاگەیاندراوێكدا ئاشكرایكردووە، لەچێوەى جێبەجێکردنی کاروباری فڕۆکەخانە و کۆنتڕۆڵکردنی گەشتی گەشتیاران بۆ دەرەوەی وڵات، دوێنێ لە گەشتێكی سلێمانی- دوسلدۆف، “توانیویانە ڕێگریبکەن لە هەوڵێکى ساختەکاریى گروپێکى گەشتیاران، کە ژمارەیان ٢٤ گەشتیار بوو”.
فڕۆكەخانەكە دەڵێت، ئەو گروپە بەنیازبوون گەشتى دەرەوەى وڵات بکەن، “بەڵام دوای وردبینی لە دۆکیومێنت و بەڵگەکانیان، دەرکەوت هەڵگرى جۆرێک لە دۆکیومێنتن کە هیچ بەڵگەیەکى فەرمیی نەبووە بۆ گەشتكردن بۆ دەرەوەى وڵات”، بۆیە گروپەکە گواستراونەتەوە بۆ بنکەى پۆلیسى فڕۆکەخانە و لەئێستادا لە قۆناغی لێکۆڵینەوەدان، بڕیاری کۆتاییش لای دادگا دەبێت.
فڕۆكەخانەی سلێمانی دەستخۆشی و سوپاسى بۆ بەرپرس و ئەفسەر و کارمەندانى بنکەى نشینگەى فڕۆکەخانە و تیمەکانى ئاسایش هەیە لە جێبەجێکردنى ڕێکار و ڕێنماییەکانى گەشتکردن و ڕێگەنەدان بە دزەکردنى هیچ کەس و گروپ و گەشتیارێک، کە بیانەوێت بەشێوەى نایاسایی فڕۆکەخانەكە بەکاربهێنن بۆ گەشتکردن.
