دوێنێ لە باکووری فەرەنسا 7 کۆچبەری کورد، لەناو ساردکەرەوەیەکدا ڕزگارکران، کاتێک ویستبوویان لە بەلجیکاوە خۆیان بگەیەننە بەریتانیا، لەکاتێکدا پلەی گەرمای ساردکەرەوەکە 25 پلە ژێر سفر بووە.
بەپێی زانیارییەکانی ڕێکخراوەکانی بەهاناوەچوونی کۆچبەران، ئەو کەسانەی هەوڵیانداوە بە ساردکەرەوەکە خۆیان بگەیەننە بەریتانیا خێزانێکی کورد بوون و منداڵیشیان پێبووە.
کاتێک کۆچبەرەکان چوونەتە ناو ئۆتۆمبێلی ساردکەرەوەکەوە، نەیانتوانیووە زیاتر خۆیان ڕابگرن، لەبەر نزمی پلەی گەرمییەکەی، بۆیە تەلەفۆنیان بۆ ڕێکخراوەکانی بەهاناوەچوونی کۆچبەران کردووە.
لە ڕێگادا شۆفێری بارهەڵگرەکە هەستی بە دەنگەدەنگ و کوتانی بارهەڵگرەکەی کردووە، دواتر بۆیدەركەوتووە کە 7 کەس خۆیان لە ساردکەرەوەکەدا شاردووەتەوە.
ڕێگای خۆشاردنەوە لەناو بارهەڵگردا، یەکێکە لە ڕێگاکانی گەیشتن بە بەریتانیا کە کۆچبەران دەیگرنەبەر، هۆکاری هەڵبژاردنی ساردکەرەوەکانیش ئەوەیە کە کەمتر پشکنینی بۆدەکرێت، بەهۆی ئەوەی کە پێیان وایە مرۆڤ ناتوانێت خۆی لە ساردکەرەوەکەدا بشارێتەوە بەهۆی نزمی پلەی گەرما.
