لەگەڵ نزیکبوونەوە لە وەرزی سەرما، تا ئێستا ناوچە سنووری و شاخاوییەکان بە نووسراوی فەرمیی حکومەت ئاگادارنەکراونەتەوە بۆ وەرگرتنی بەشە نەوتی سپی.
زانا ڕەحمان قائیمقامی پێنجوێن، بە تۆڕی میدیایی ئێستای ڕاگەیاند، “تا ئێستا هیچ نووسراوێکی فەرمیی حکومەتمان پێنەگەیشتووە بۆ وەرگرتنی نەوتی سپی، تەنها لە ڕاگەیاندنەكانەوە گوێمان لێبووە نەوت دابەشدەکرێت”.
پێشتر سەرچاوەیەک لە ئەنجومەنی وەزیرانی حکومەتی هەرێمەوە ئاشکرایکردبوو، حکومەتی هەرێم لەسەرەتای ئەم مانگەوە دەست بەدابەشکردنی نەوتی سپی دەکات و سەرەتا لە ناوچە سنووری و شاخاوییەکانەوە دەستپێدەکات، چونکە بەراورد بە شوێنەکانی دیکە، زووتر وەرز و شەپۆلی سەرما دەیانگرێتەوە.
لای خۆیەوە ئیسماعیل بەحری لە بەڕێوەبەرایەتیی نەوت و کانزاکانی سلێمانی – نوێنەر لە ئیدارەی ڕاپەڕین، بە تۆڕی میدیایی ئێستای ڕاگەیاند، “تا ئێستا هیچ نووسراوێک نەهاتووە سەبارەت بە دابەشکردنی نەوت لە سنووری ئیدارەی ڕاپەڕین، بەڵام بڕیارە لەم چەند ڕۆژەدا ئەو پرسە یەکلایی ببێتەوە”.
تۆڕی میدیایی ئێستا پەیوەندیکرد بە محەمەد حەسیب، بەڕێوەبەری نەوت و كانزاكانی سلێمانی، بەڵام پەیوەندییەکە وەڵام نەدرایەوە.
