دوێنێ پێنجشەممە، ڤیدیۆیەک لە تۆڕە کۆمەڵایەتییەکان لە عێراق بڵاوکرایەوە، کە نیشانی دەدات باوکێک بە قورسی ئەشکەنجەی منداڵەکەی دەدات.
ئەمڕۆ هەینی، نوسینگەی مستەفا کازمی، سەرۆکوەزیرانی عێراق ڕایگەیاند، “بڕیاری دەستگیرکردن بۆ ئەو باوکە دەرچووە، کە یەکێک لە منداڵە کوڕەکانی ئەشکەنجە دەدات”.
مستەفا کازمی، داوای لە بەرپرسانی دادوەری کردووە تا کۆتایی لەگەڵ ئەو دۆسییەدا بڕۆن و هەر سزایەک یاسای عێراقی دەیگرێتەوە دژی ئەو باوکە بیگرنەبەر.
لە ڤیدیۆکەدا دەردەکەوێت منداڵێک بە قورسی ئەشکەنجەدراوە و هەموو گیانی خوێنی لێدێتەخوارەوە و دەپاڕێتەوە لە باوکی کە ئیتر کۆتایی بە ئەشکەنجەی بهێنێت.
منداڵەکە لەلایەن باوکییەوە زنجیرکراوەتە ملی و ئەشکەنجەدراوە، لەگەڵ ئەوەش شوێنەکە تەنها ئەو باوک و کوڕەی لێنییە و کەسی دیکە لە ڤیدیۆکەدا دەردەکەوێت.
تۆڕی میدیایی ئێستا بەهۆی پابەندبوون بە بنەما پیشەییەکانی کاری ڕۆژنامەوانییەوە ڤیدیۆکە بڵاوناکاتەوە.
