بەرگریکار و کاپتنی یانەی ڕیاڵ مەدرید، سێرجیۆ ڕامۆس بە ئاستە ناوازەکەی سەرنجی زۆرینەی هاندەرانی تۆپی پێی ڕاکێشاوە و وەک یەکێک لە باشترینەکانی مێژوو ناودەبرێت.
بۆ ئەم مەبەستە گۆڤاری فرانس فوتباڵی بەخشەری خەڵاتی باڵۆندۆر، ڕاپرسییەکی لە ماڵپەڕی ئەلیکترۆنی یانەکەوە ئەنجامداوە و تیایدا پرسیار دەکات: ئایا ڕامۆس باشترین سەنتەری بەرگریە لە مێژووی تۆپی پێدا؟
لە ڕاپرسییەکەدا 7113 دەنگدەر بەشدارییانکردووە (تاوەکو ئێستا)، لەسەدا 68 بە بەڵێ و لەسەدا 32 بە نەخێر دەنگیانداوە، واتا زۆرینە بە باشترین بەرگریکاری مێژووی دەزانن، لە کاتێکدا بەرگریکارە پۆڵایینەکەی مەدرید لە لیستی پاڵێوراوان بۆ خەڵاتی باڵۆندۆری مێژوویی ڕکابەری چەندین ئەفسانەی وەک فرانکۆ باریزی، فرانز بیکنباوەر، فابیۆ کاناڤارۆ، مارسێل دوسایی، ڕۆناڵد کومان، بۆبی مۆر، دانیال پاسارێلا، ماتیاس زامەر دەکات.
ڕامۆس لە 2005وە تاوەکو ئێستا 657 یاری زیاتری بۆ ڕیاڵ مەدرید کردووە، تۆمارکەری 100 گۆڵ و 39 ئەسیست بووە، هەروەها 22 نازناوی چنیوەتەوە.
