باڵیۆزی فەڕەنسا لە تورکیا بانگھێشتی وڵاتەکەی کرایەوە

بەپێی ئەو ڕاگەیەندراوەی لە کۆشکی ئیلیزێ بڵاوکراوەتەوە، ئاماژە بەوە کراوە کە لێدوانەکانی ڕەجەب تەیب ئەردۆغان، سەرۆكکۆماری تورکیا لەبارەی ئیمانوێل ماکرۆن، سەرۆكی فەڕەنسا، “مایەی قبوڵ نییە”.

ھەر لە ڕاگەیەندراوەکەدا كە ئەمڕۆ یەكشەممە 25ی تشرینی یەكەم بڵاوكراوەتەوە، ئاماژە بەوەشکراوە کە باڵیۆزی ھەرڤی ماگرۆ، فەڕەنسا لە تورکیا، بەمەبەستی ڕاوێژکردن بانگھێشتی فەڕەنسا کراوەتەوە.

ئەردۆغان دوێنێ شەممە 24ی تشرینی یەكەم ڕەخنەی لە فەڕەنسا گرت و گوتی، ” ئەو کەسەی پێیی دەوترێت ماکرۆن چی کێشەیەکی لەگەڵ ئیسلام ھەیە؟ چی کێشەیەکی لەگەڵ موسڵمانان ھەیە؟، ماکرۆن پێویستی بە پشکنینی عەقڵی ھەیە، چونکە چۆن سەرۆکی دەوڵەتێک بەم شێوەیە مامەڵە لەگەڵ ملیۆنان لە پەیرەوانی ئاینی جیاواز (موسڵمانان) لە وڵاتەکەیدا، دەکات، دوای یەک ساڵ ھەڵبژاردن ھەیە، چارەنوسی ماکرۆن لە ھەڵبژاردنەکان دەبینین، پێموایە كۆتاییهاتنی نزیكە”.