لە کۆتاییەکانی 2022 یاریگا و پێکهاتەی ڕیاڵ مەدرید لەلایەن فلۆرنتینۆ پێرێزی سەرۆکی یانەوە نوێدەکرێتەوە.
ڕۆژنامەکانی مارکا و “ئەی ئێس”ی ئیسپانی بڵاویانکردووەتەوە، گواستنەوەکانی داڤید ئالابا و ئیدواردۆ کاماڤینگا دەستپێکی ئەو پڕۆسەی نوێکارییە بووە کە ئیدارەی فلۆرنتینۆ پێرێز بڕیاری جێبەجێکردنیداوە.
بەپێی سەرچاوەکە، لە کۆتاییەکانی ساڵی 2022 یاریگای سانتیاگۆ بێرنابیۆ بە نوێترین تەکنەلۆجیا و گۆڕانکاری تەلارسازییەوە بەڕووی هاندەراندا دەکرێتەوە، دەبێتە یەکێک لە گەورەترین سەنتەرە بازرگانییەکان لە مەدرید و ئیسپانیا بەگشتی، ئەم پڕۆژەیەش پێویستی بە پاڵپێوەنەرێکی وەرزشیی بەهێزتر دەبێت، تاوەکو هەموو جیهان سەرنج بخاتە سەر مەدرید.
لەگەڵ گۆڕانکارییە کارگێڕییەکاندا، فلۆرنتینۆ پێرێزی سەرۆکی یانە پلانی داڕشتووە بۆندی سێ یاریزانی گەورە و گرانبەها واژووبکات، پێکهاتوون لە: کیلیان مباپێ (پاریس سان جێرمان)، ئێرلینگ هالاند (دۆرتمۆند)، پۆل پۆگبا (مانچستەر یونایتد)، دووان لەو یاریزانانە بۆندەکانیان هاوینی 2022 کۆتاییدێت و گواستنەوەیان بێبەرامبەرە، گواستنەوەی ئێرلینگ هالاندیش بەنزیکی 90 ملیۆن یورۆ مسۆگەر دەکرێت.
