چه‌ند دزێك، به هه‌مانشێوه‌ی فیلمی “Mission impossible” ئۆتۆمبێله‌كه‌ى تۆم كروز ئه‌كته‌ری ناودارى هۆڵیوود ده‌دزن.
دزه‌كان به‌بێ ئه‌وه‌ی پێشتر له ئۆتۆمبێله‌كه‌ى تۆم كروز نزیكببنه‌وه، فریكوێنسیی سویچه‌كه‌یان سكان كردووه و دواتر كۆپییان كردووه و به‌وشێوه‌یه توانیویانه ده‌رگاكانى ئۆتۆمبێله‌كه بكه‌نه‌وه و كارى پێبكه‌ن.
ڕووداوه‌كه له به‌رده‌م هۆتێلێكدا له شارى بێرمنگهام-ی به‌ریتانیا ڕوویداوه، تۆم كروز سه‌رگه‌رمی وێنه‌گرتنى به‌شى حه‌وته‌مى فیلمه ناوداره‌كه‌یه‌تی كه ناوى “Mission impossible”ـه و پۆلیسی شاره‌كه ده‌ڵێت، “دواى ئه‌وه‌ی تۆم كروز ئۆتۆمبێله‌كه‌ى له‌به‌رده‌م هۆتێله‌كه‌دا ڕاگرتووه، دزه‌كان به به‌رچاوى پاسه‌وانه‌كانه‌وه پلانه‌كه‌یان جێبه‌جێكردووه”.
ئۆتۆمبێله‌كه له جۆری بی ئێم ده‌بلیو ئێكس7ـه و چه‌ندین كه‌ره‌سته‌ی تیادابووه كه به‌هایان هه‌زاران یۆرۆیه. به‌پێی لێدوانى پۆلیس، دواى ماوه‌یه‌كی كه‌م له دزرانى، ئۆتۆمبێله‌كه دۆزراوه‌ته‌وه به‌ڵام كه‌ره‌سته‌كانى ناوى نه‌ماون و دزراون.
فیلمى “Mission impossible” تا ئێستا شه‌ش به‌شی نمایشكراون و له سه‌رجه‌میاندا تۆم كروز ئه‌كته‌ری سه‌ره‌كییه و رۆڵی كارمه‌ندی ده‌زگاى هه‌واڵگری ده‌گێڕێت. به‌وه ناسراوه كه له‌و فیلمانه‌دا له‌ڕێگه‌ى به‌كارهێنانى شێواز و ته‌كنیكی كۆمپیوته‌ری و دیجیتاڵییه‌وه، ده‌رگا و كلیلی شوێنه‌كان و قاسه و گه‌نجینه و ئامێره هه‌ستیاره‌كان هاكده‌كات و ده‌یانكاته‌وه و هه‌ر به‌هه‌مان ئه‌و شێوازه‌ش بۆمب و مووشه‌ك پووچه‌ڵده‌كاته‌وه.
