قائیمقامیەتی هەڵەبجە لەبارەی گرانبوونی نرخی نانەوە بڕیاریدا فرۆشتنی نان بەهەمان نرخی پێشووتری بمێنێتەوە و هەر نانەواخانەیەکیش سەرپێچی بکات، ڕێکاری یاسایی بەرامبەر دەگیرێتەبەر.
ئه‌مڕۆ سێشه‌ممه 17ى ئاب قائیمقامیەتی هەڵەبجە ڕایگەیاند، لیژنەکانیان سەردانی مەیدانییان بۆ ئەو نانەواخانانە ئەنجامداوە کە ماوەی چەند ڕۆژێکە نرخی نانیان گرانکردبوو، ئەمڕۆ دوای کۆبوونەوەی سەرۆکی لیژنەکان و قائیمقامی هەڵەبجە, نرخی نان جێگیرکرا بەهەمان نرخی پێشووی.
بەوپێیە نرخی هەشت نان بە هەزار دینار دەبێت و سەرجەم نانەواخانەکانیش بۆ ئەو مەبەستە لەلایەن لیژنەکانی قائیمقامیەتەوە پسووڵەی ئاگادارکردنەوەیان بۆ نێردراوە.
قائیمقامیەتی هەڵەبجە ڕایگەیاندووە، هەر کەسێک سەرپێچیی بڕیارەکە بکات ڕێکاری یاسایی بەرامبەر دەگیرێتەبەر.
