ڕاوێژکاری ئاسایشی نیشتیمانیی عێراق ڕایدەگەیەنێت، کشانەوەی هێزێکی تایبەتی هاوپەیمانیی نێودەوڵەتی لەعێراق، لەچوارچێوەی ئەو ڕێککەوتنەدایە کە لە گفتوگۆی ستراتیژیی عێراق و ئەمریكا بڕیاریان لەبارەوە درابوو، بۆیە پێشوازی لەو هەنگاوە دەکەن.
قاسم ئەعرەجی، ڕاوێژکاری ئاسایشی نیشتیمانیی عێراق لە تویتێكدا لە تۆڕی كۆمەڵایەتیی تویتەر نوسیویەتی، “پێشوازی دەکەین لە بڕیاری هاوپەیمانیی نێودەوڵەتی بۆ کشانەوەی هێزی وەڵامدانەوەی خێرا ناسراو بە OTH لە عێراق و گەڕانەوەیان بۆ بنکەی سەرەکیی خۆیان لە کوەیت”.
ڕاشیگەیاندووە، “بڕیاری كشانەوەی ئەو هێزە لەچوارچێوەی ئەو ڕێککەوتنەدایە کە بەغداد و واشنتۆن لە گفتوگۆی ستراتیژی لەسەری ڕێککەوتوون، بە کشانەوەی سەرجەم هێزە شەڕکەرەکان تا کۆتایی ئەمساڵ”.
ئەعرەجی ئاماژەی بەوەشكردووە، بڕیارەکە وەک پابەندبوون و ڕاستگۆیی هەردوولا بە رێککەوتنەکە دەبینن.
لە چەند ڕۆژی ڕابردوو هاوپەیمانیی نێودەوڵەتی ڕایگەیاند، هێزی تایبەتی وەڵامدانەوەی خێرا ناسراو بە OTH لە عێراق کشاوەتەوە بۆ بنکەی سەرەکی خۆی لە کوەیت گەڕاوەتەوە.
