بەهۆی ئەو بۆندە بازرگانییەی لەنێوان لالیگا و کۆمپانیایەکی وەبەرهێناندا واژوودەکرێت، یانەی ڕیاڵ مەدرید لە کڕینی کیلیان مباپێ نزیکدەبێتەوە.
یانەی ڕیاڵ مەدرید بە بەدەستهێنانی (260) ملیۆن یورۆ سوودمەندی سەرەکی دەبێت لە بۆندی واژووکراوی نێوان ڕایەڵەی یانەکانی لالیگا و کۆمپانیای (cvc).
لەو بارەیەوە ڕۆژنامەی “ئەی ئێس”ی ئیسپانی ئاشکرایکردووە، بۆندی بازرگانی نێوان لالیگا و (cvc)، بڕی 260 ملیۆن داهاتی زیادە بە یانەی شاهانە دەبەخشێت، ئەو بڕەش لە هاوسەنگکردنەوەی دۆخی دارایی و گواستنەوەکاندا بەکاردەخرێتەوە.
ئەو بەربەستە داراییەی لەپێشوودا ڕیاڵ مەدرید هەیبووە بۆ گواستنەوەی کیلیان مباپێی هێرشبەری فەرەنسی یانەی پاریس سان جێرمان، تێکدەشکێت و گواستنەوەکە نزیکتر دەبێتەوە.
ڕۆژنامەکە نوسیویەتی، بەڕێوەبەرانی شاهانە بەسەرپەرشتی فلۆرنتینۆ پێرێز تێچووی کڕینی مباپێ-یان بەردەستدەبێت، بۆیە هەوڵێکی دیکە بۆ واژووکردنی گرێبەستەکە دەدەن، ئەگەرچی سەرۆکایەتیی پاریس داوای 200 ملیۆن یورۆ دەکات، تەنانەت کۆمپانیا زەبەلاحەکانی بواری گرەوکردن ڕێژەیەکی بەرزیان بۆ واژووکردنی گرێبەستەکە دەستنیشانکردووە.
