تۆنی کرۆس بەهۆی پێکانەوە ماوەیەک لە یاریکردن دووردەکەوێتەوە، لەو ماوەیەدا کارلۆ ئەنچلۆتی ناچارە بە یاریزانێکی دیکە پێگەکەی پڕبکاتەوە.
یانەی ڕیاڵ مەدرید بەفەرمی ئاشکرایکردووە، تۆنی کرۆس تووشی هەوکردنی ماسولکەی ڕان و حەوزی هاتووە، بەو هۆیەوە ماوەیەک پشوو وەردەگرێت، ڕەنگە دەستپێکی لالیگای وەرزی 2021-2022 لەدەستبدات.
ماڵپەڕێ “90min” لەو بارەیەوە نوسیویەتی، چارەسەری تاکتیکی پێگەی کرۆس ئاسان نییە، لەگەڵ ئەوەشدا کارلۆ ئەنچلۆتی چەند بژاردەیەکی لەبەردەستدایە، یەکێک لە بژاردەکان بەکارخستنی فیدریکۆ ڤاڵڤێردی-یە، وەرزی 20-21 ڤاڵڤێردی لەسێ یاریدا جێگەی کرۆسی گرتووەتەوە و باشترین ئاستی پێشکەشکردووە، لەهەر سێ یارییەکەشدا براوەبوون.
چارەسەرێکی دیکە داڤید ئالابایە، دوای چارەسەربوون لە کۆرۆنا دەتوانێت جێگەی یاریزانە ئەڵمانییەکە بگرێتەوە، چارەسەرەکانی دیکەش بریتین لە مارتین ئۆدیگارد و ئیسکۆ، کە هەردووکیان لە لیستی فرۆشتندان.
سەرچاوەکە کڕینی یاریزانێکی وەک ستیفانۆ سێنسی، یاخود برۆزۆڤیچ و پاریدێس بەدوور نازانێت.
