کۆمپانیای ئێربەسی فەرەنسی کەشتییەکی بارهەڵگر بۆ بۆشایی ئاسمانی دروستدەکات، کە بۆ گواستنەوەی یەکەم نموونەی بەردی سەر هەسارەی مەریخ بۆ سەر زەوی بەکاردەهێنرێت.
پێشبینیدەکرێت پرۆژە هاوبەشەکەی ئەمریکا و ئەورووپا ملیاران دۆلاری تێبچێت، هەروەها زیاتر لە 10 ساڵی پێویستە بۆ جێبەجێکردنی.
بەڕێوبەری بەشی دۆزینەوە مرۆیی و ڕۆبۆتییەکان لە ئاژانسی ئەورووپیی بۆشایی ئاسمان (ESA)، دەیڤد پارکەر بە بی بی سی وت، “ئەم ئەرکە لە ئەرکەکانی دیکەی تایبەت بە مەریخ ئاسانتر نییە، بەڵکو کاتێک بیر لە ئاڵۆزییەکەی دەکەیتەوە، زۆر قورستریشە. ئەم مانگە دەستکردەی ئێربەس ناودەنێم ‘یەکەم کەشتیی بارهەڵگری نێوهەسارەیی'”.
مانگە دەستکردەکە کێشەکەی 6.5 تۆنە و ساڵی 2026 ڕەوانەی بۆشایی ئاسمان دەکرێت، بە دەوری هەسارە سوورەکەدا دەخولێتەوە، دواتریش بەردەکان باردەکات و دەیانگەڕێنێتەوە بۆ سەر زەوی.
ڕۆڤەر ئامێرێکە لە شێوەی ئۆتۆمبێل. لە کۆتاییەکانی سەدەی بیستەوە، ئاژانسی ناسا بە مەبەستی ئەنجامدانی توێژینەوە و کۆکردنەوەی زانیاری، چەندین ڕۆڤەری ڕەوانەی مەریخ کردووە.
