بڕیارە سبەی سێشەممە، ئەنجومەنی پارێزگای سلێمانی دەنگبدات لەسەر پەسەندکردنی نزیکەی 65 ملیار دینار بۆ پڕۆژەکانی پارێزگای سلێمانی و ئیدارە سەربەخۆکان، دەوامی فەرمانگەكان و لێبڕینی موچەش تەوەرێكی دیكەی كۆبوونەوەكەیە.
بەپێی کارنامەی کۆبوونەوەی سبەی ئەنجومەنی پارێزگا، دەنگ دەدرێت لەسەر پەسەندکردنی بودجەی پڕۆژەکانی سنوری پارێزگای سلێمانی بەسەرجەم قەزا و ناحیەکانیەوە بەبڕی 65 ملیار و 22 ملیۆن دینار.
هەر لە کۆبوونەوەکەی سبەیدا بڕیارە دەنگبدرێت لەسەر پەسەندکردنی بڕی زیاتر لە 12 ملیار دینار بۆ پڕۆژەکانی ئیدارەی گەرمیان و هاوکات زیاتر لە 16 ملیار دینار بۆ ئیدارەی ڕاپەڕین.
تەوەرێكی دیكەی كۆبوونەوەكەی ئەنجومەنی پارێزگای سلێمانی بریتییە لە گفتوگۆكردن لەسەر دەوامی فەرمانگەكان و هەروەها بەردەوامبوونی لێبڕینی موچە.
ساڵانە پارێزگاکان بڕی بودجەی پەرەپێدانیان بۆ دیاری دەکرێت و لە ئەنجومەنی پارێزگاوە، بە هەماهەنگی لەگەڵ ئیدارە و قەزا و ناحیەکاندا، بڕی پارەکە بۆ پڕۆژەكان دەنگی لەسەردەدرێت.
لە بودجەی پەرەپێداندا زیاتر گرنگی بە جێبەجێکردنی پڕۆژە خزمەتگوزارییەکان دەدرێت و بەشێک لە قەزا و ناحیەکانیش لە بڕی پارەی تەرخانکراو بۆ ئیدارەکەیان ناڕازین.
