سەرچاوەکانی هەواڵ دووپاتیدەکەنەوە، پەیوەندی نێوان یانەی یوڤانتۆس و کریستیانۆ ڕۆناڵدۆ گۆڕانکاری بەسەردا نەهاتووە و بەم نزیکانە بۆندی نێوانیان نوێدەکرێتەوە.
بەپێی زانیارییەکانی ڕۆژنامەی لاگازێتا دێلۆ سپۆرت، هەموو ئەو زانیارییانەی ئاماژەیان بە تێکچوونی پەیوەندی نێوان کریستیانۆ ڕۆناڵدۆ و ئیدارەی یانەی یوڤانتۆس کردووە، دوورن لە ڕاستییەوە و یاریزان و یانەکەی هەرگیز لەیەکدی دوورنەکەوتوونەتەوە.
سەرەڕای خواستی یانەی مانچستەر یونایتد لەسەر واژووکردنی بۆندێک لەگەڵ “دۆنی پۆرتوگال”، بەڵام یاریزانەکە لەگەڵ ئەندریا ئانێلی سەرۆکی بیانکۆنێری و هاوکارانی کۆبوونەوەی کردووە و بڕیاردراوە بەردەوامی بە پەیوەندییەکانی نێوانیان بدەن.
لاگازێتا نوسیویەتی، کریستیانۆ ڕەزامەندی نیشانداوە بۆ ماوەی دوو وەرزی دیکە بۆندەکەی لەگەڵ یوڤانتۆس نوێبکاتەوە، بەڕێوەبەرانی یانە ئیتاڵییەکەش دووپاتیانکردووەتەوە، هەرگیز خواستیان لەسەر فرۆشتنی نەبووە.
کریستیانۆ ڕۆناڵدۆ لە هاوینی 2018وە بۆندی لەگەڵ یوڤانتۆس واژووکردووە، دوای ماڵئاواییکردنی هەڵبژاردەی وڵاتەکەی (پۆرتوگال) لە یورۆی 2020، ناچاربوو داهاتووی لەگەڵ یوڤانتۆس یەکلاییبکاتەوە، چونکە لە هاوینی 2022 بۆندەکەی کۆتاییدێت.
