وەزارەتی کشتوکاڵی عێراق ڕایگەیاند، هەماهەنگی زیاتر دەکەن بۆ گواستنەوەی بەرهەمەکانی گۆشت و پەلەوەر لە هەرێمی کوردستانەوە بۆ پارێزگاکانی عێراق.
بەپێی ڕاگەیەندراوێکی وەزارەتی کشتوکاڵی عێراق، ئاشکرا کراوە، کە هاوردەکردنی بەرهەمەکانی گۆشت و پەلەوەر و سەوزە و میوە لە هەرێمی کوردستانەوە دەستیپێدەکاتەوە و بە مەرجێک بەرهەمەکان هی ناوخۆی هەرێم بێت و هاوردە نەکرابێت.
لەکاتی قەدەغەکردنی هاوردەکردنی بەرهەمە ناوخۆییەکان لە هەرێمی کوردستانەوە بۆ پارێزگاکانی عێراق، وەزیری کشتوکاڵی عێراق سەردانی هەرێمی کوردستانیکرد و یاداشتێکیان لەگەڵ وەزارەتی کشتوکاڵی هەرێم واژوو کرد.
بەهۆی قەدەغەی هاوردەکردنی ئەو بەرهەمانەوە لە هەرێمەوە بۆ ناوچەکانی دیکەی عێراق، نرخی گۆشت و مریشک و سەوزە لە پارێزگاکانی دیکەی عێراق بەرزبوویەوە.
بەپێی ئەزموونی پێشوتر هەرکاتێک بەرهەمە ناوخۆییەکانی هەرێم ڕوو لە ناوچەکانی دیکەی عێراق بکات نرخی ئەو بەرهەمانە لە هەرێم بەرزدەبێتەوە.
