جامی نەتەوەکانی ئەوروپا لە تێپەڕاندنی قۆناغی کۆمەڵەکان نزیکدەبێتەوە، تاوەکو ئێستا (11) هەڵبژاردە سەرکەوتنیان بۆ قۆناغە یەکلاکەرەوەکان مسۆگەرکردووە.
لە کۆمەڵەی یەکەم هەڵبژاردەکانی ئیتاڵیا و ویڵز، لە کۆمەڵەی دووەم بەلجیکا و دانیمارک، لە کۆمەڵەی سێیەم هۆڵەندا و نەمسا وەک یەکەم و دووەمی کۆمەڵەکانیان بلیتی قۆناغی (16)یان مسۆگەرکردووە، هەروەها هەڵبژاردەکانی ئینگلتەرا، چیک، سوید، سویسرا و فەرەنساش قۆناغی کۆمەڵەکانیان تێپەڕاندووە.
بڕیاریشە ڕۆژی چوارشەممەی داهاتوو یارییەکانی گەڕی سێیەم لەسەر ئاستی کۆمەڵەکانی پێنجەم و شەشەم ئەنجامبدرێت، لە دوای ئەو وادەیەش تەواوی هەڵبژاردە سەرکەوتووەکان ئاشکرادەبن و پێنج هەڵبژاردەی دیکە سەرکەوتن مسۆگەردەکەن.
پێوەرەکان چین؟
بەپێی پێوەرە کارپێکراوەکانی (یوێفا)، یەکەم و دووەمی هەر کۆمەڵەیەک ڕاستەوخۆ سەرکەوتن بۆ قۆناغی (16) مسۆگەردەکەن.
هەروەها چوار هەڵبژاردەی دیکە لە پلەکانی سێیەم پۆلێن دەکرێن و هاوشانی 12 هەڵبژاردە سەرکەوتووەکە بلیتی قۆناغە یەکلاکەرەوەکانیان پێدەبەخشرێت.
بۆ دیاریکردنی باشترینەکانی پلەی سێیەم چەند پێوەرێک دیاریکراون:
- زۆرترین خاڵ: لە کۆی شەش هەڵبژاردە، چواریان کە زۆرترین خاڵیان کۆکردووەتەوە سەردەکەون.
- لە حاڵەتی یەکسانبوونی خاڵەکاندا، یەکەم پێوەر دەبێتە زۆرترین جیاوازی گۆڵ (ئەو گۆڵانەی تۆماریان کردووە و لەسەریان تۆمارکراوە).
- زۆرترین گۆڵی تۆمارکراو.
- زۆرترین بردنەوە.
- یاری خاوێن “کارتی زەرد (-1)، کارتی سوور (-3)”
- باشترین پێگەی هەڵبژاردەکان لە ڕیزبەندیی هەڵبژاردەکانی یوێفا.
