ئێوارەی ئەمڕۆ فڕۆکەجەنگییەکانی تورکیا بۆردومانی ئۆتۆمبیلێکیان لەناو گوندی گەڵاڵەکردووە لە ناوچەی شارباژێڕ.
بەپێی ئەو ڤیدیۆیانەی بۆ تۆڕی میدیایی ئێستا نێردراوە تێیدا دەردەکەوێت بۆردومانەکە ڕاستەوخۆ لەناو گوندەکەدا کراوە.
کامەران حەسەن، قائیمقامی قەزای ماوەت بە تۆڕی میدیایی ئێستای ڕاگەیاند، “خەڵکی گوندی گەڵاڵە سەلامەتن و هیچ کەسێکیان بریندار نەبووە، بەڵام بەداخەوە ئۆتۆمبیلێکی مەدەنی گەریلاکانی پەکەکە کراوەتە ئامانج و کوژراو برینداریان هەیە”.
پێشتر ناوچەی شارباژێر شوێنی جموجوڵی گەریلاکانی پارتی ژیانی ئازادی (پژاک) بووە و بەهۆی هاوسنوری ناوچەکە لە ئێرانەوە گەریلاکانی (پژاک) لە ناوچەکەدا بوونیان هەبووە.
ماوەی دوو ساڵە ناوچەی شارباژێریش وەک ناوچەی بۆردومانکراوی تورکیا دانراوە و ساڵی ڕابردوو بەهۆی بۆردومانی فڕۆکە جەنگییەکانی تورکیاوە لە سەیرانگای کونە ماسی هاوڵاتییەکی دانیشتووی ناوچەکە شەهیدکرا، بەهۆی بەردەوامی بۆردومانەکانی تورکیاوە چەندین گوندی سنوری ناوچەکە پوش و پاوانەکانیان سوتا.
