لە دوو رێوڕەسمی جیادا فەرماندەی بنکەی مەشقی پیادەى سلێمانی و جێگری فەرماندەی فیرقەی دووی هێزی پێشمەرگە دەستبەكاربوون.
رێوڕەسمەكان ئەمڕۆ بە ئامادەبوونی مستەفا چاوڕەش، فەرماندەی هێزەکانی ٧٠ و لیوا روکن عومەر ساڵح، سەرۆکی دەستەی ئەرکانی هێزەکانی ٧٠ و لیوا روکن مەریوان محەمەد، فەرماندەی هێزەکانی پشتیوانیی دوو و وەهاب هەڵەبجەیی، بەڕێوەبەری گشتیی دژەتیرۆر و ژمارەیەک لە ئەفسەرانی پلەباڵا بەڕێوەچوو.
لە بنکەى مەشقى پیادەى سلێمانى دەستبەکاربوونی عەمید یاسین جەلال وەک فەرماندەی نوێى بنکەكە لەجێگای عەمید عیماد محەمەد-ی فەرماندەی پێشوو راگەیەنرا.
هەروەها لە فیرقەی دووی هێزی پێشمەرگە، عەمید عیماد محەمەد، وەک جێگری فەرماندەی فرقەی دوو دەستنیشانکرا.
ئەم گۆڕانکارییانە لە چێوەی پرۆسەی یەکخستنەوە و رێکخستنەوەی هێزی پێشمەرگەی کوردستانە کە ئامانج لێی بەرەوپێشبردن و بەهێزکردنی توانا سەربازییەکانی هێزی پێشمەرگەی کوردستانە.
