پاش گەیشتنی بە بەغداد بڕیارە وەزیری دەرەوەی یۆنان سەردانی هەرێمی كوردستانیش بكات، سەرەڕای تاووتوێی پەرەپێدانی پەیوەندییە سیاسی و ئابورییەکانی نێوان یۆنان و هەرێم، بڕیارە کونسوڵخانەی وڵاتەكەی لە هەولێر بکاتەوە.
بڕیاریشە دوانیوەڕۆی ئەمڕۆ وەزیری دەرەوەی یۆنان لە ڕێگەی فڕۆکەخانەی نێودەوڵەتیی هەولێرەوە بگاتە هەرێمی کوردستان.
بەپێی کارنامەی سەردانەکەی، دندیاس لەگەڵ هەریەک لە نێچیرڤان بارزانی، سەرۆکی هەرێمی کوردستان و مەسرور بارزانی، سەرۆکی حکومەتی هەرێمی کوردستان و مەسعود بارزانی، سەرۆكی پارتی دیموكراتی كوردستان كۆدەبێتەوە و دواتریش کونسوڵخانەی یۆنان لە هەولێر دەکاتەوە.
بەپێی زانیارییەکان، دندیاس لە دیدارەکانیدا لەگەڵ بەرپرسانی هەرێمی کوردستان دۆخی سیاسی و ئابوریی هەرێمی کوردستان و عێراق و ناوچەکە تاووتوێ دەکەن، هەروەها گفتوگۆ دەکەن لەبارەی پەرەپێدانی پەیوەندییە ئابورییەکانی نێوان یۆنان و هەرێمی کوردستان.
