لەسەر دۆسیەی ڕووبەری ئەو زەوییەی بۆ ناوچەی پیشەسازیی ڕزگاری تەرخانکراوە، بەڕێوەبەری شارەوانییەکانی گەرمیان فەرمانی دەستگیرکردنی بۆ دەرچووە، دەشڵێت، “فەرمانەکە زیاتر سیاسییە وەک لەوەی بابەتێکی یاسایی بێت”.
دادگای لێکۆڵینەوەی دەستپاکیی گەرمیان فەرمانێکی دەرکردووە، داوا لە لایەنی پەیوەندیدار دەکات بەرزان کەریم محەمەد، بەڕێوەبەری گشتیی شارەوانییەکانی گەرمیان دەستگیربکەن و ڕادەستی دادگای بکەن، بەپێی ماددەی 340ی یاسای سزادانی عێراقی.
لەوبارەیەوە بەرزان کەریم بە تۆڕی میدیایی ئێستای وت، “دۆسییەکە پەیوەندیی بە ڕووبەری ئەو زەوییەوە هەیە، کە لە ناحیەی ڕزگاری بۆ ناوچەی پیشەسازی تەرخانکراوە و داوای فراوانکردنی ڕووبەرەکەیان کردووە”.
ئەو بەرپرسەی شارەوانیی گەرمیان دەڵێت، “سکاڵاکە لەلایەن کەریم عەلی ئەندامی ئەنجومەنی پارێزگای سلێمانییەوە تۆمارکراوە، بەتۆمەتی ئەوەی سەرۆکی شارەوانیی ڕزگاری (ئەرسەلان ئەحمەد) ڕووبەرەکەی زیادکردووە، لەکاتێکدا ئەمە کێشەی نێوان ئەو ئەندامەی ئەنجومەن و سەرۆکی شارەوانیی ڕزگارییە و پەیوەندیی بە منەوە نییە”.
بەڕێوەبەری شارەوانییەکانی گەرمیان هۆکاری سکاڵاکە بۆ “کێشەی شەخسی” دەگەڕێنێتەوە و دەڵێت، “ئەو ئەندامەی ئەنجومەن پیشتر داوای زیادکردنی ڕووبەری زەویی یەکێک لە کەسە نزیکەکانی کردووە لە ناوچەی پیشەسازیی ڕزگاری، بەڵام بۆینەکراوە، بۆیە ئێستا ئەم سکاڵایەی تۆمارکردووە، لەگەڵ ئەوەشدا بەبڕوای من بابەتەکە زیاتر سیاسییە وەک لەوەی یاسایی بێت”.
