ئەندامێکی فراکسیۆنی یەکێتی لە پەرلەمانی کوردستان ڕایگەیاند، ئەوەی لەبارەی داهاتی سلێمانییەوە دەوترێت لابردنی تەرکیزی خەڵکە لەسەر لێبڕینی موچە و بەرزبوونەوەی نرخی نەوت.
شنۆ ئەشقی سورچی، ئەندامی پەرلەمانی کوردستان ڕایگەیاند، “ئەوەی لەبارەی داهاتی سلێمانییەوە دەوترێت، خۆدزینەوەیە لە بەرپرسیاریەتی دابینکردنی مووچە، هەوڵێکە بۆ تێکدانی یەکڕیزی و لێکترازانی زیاتری نێوان هێز و لایەنە سیاسیەکان و چەواشەکردنی خەڵک و لابردنی تەرکیزی ڕای گشتییە لەسەر ڕاستی بەرزبوونەوەی بەرچاوی نرخی نەوت بۆ سەروو 70$ “.
بە وتەی ئەو پەرلەمانتارە، لەگەڵ ئەوانەدا نرخی دۆلار زۆر بەرزە، و بەردەوامی جموجۆڵی بازرگانی لە خاڵە سنوریەکان و کۆتایی هاتنی قۆناغی کەرەنتین و بەرزبوونەوەی داهاتی ناوخۆ وادەکات کە حکومەت بیانوی لێبڕینی موچەی نەبێت.
شنۆ ئەشقی سورچی ڕاشیگەیاندووە، ” ئەمانە لە ماوەکانی ڕابردوودا بیانووی سەرەکی حکومەت بوون بۆ لێبڕینی مووچە، ئێمه لە فراکسیۆنی سەوز پێداگیرین لەسەر ئەوەی لەم قۆناغەی ئێستا پێویستە کۆتایی بە لێبڕینی مووچە بهێنرێ و ژیان و گوزەرانی فەرمانبەران و موچەخۆران ئاسایی بکرێتەوە”.
سەبارەت بە دانیشتنی پەرلەمان لەسەر بەردەوامی لێبڕینی موچە ئەو ئەندامەی فراکسیۆنی سەوز دەڵێت، ” یاداشتمان واژوو کردووە دانیشتنی داهاتووی پەرلەمان تایبەت بکرێ بە گفتوگۆکردن لەسەر کۆتایی هێنان بە لێبڕینی موچە و هۆکارەکانی جێبەجێ نەکردنی یاسای چاکسازی و بەردەوامی گەندەڵی لە خاڵەسنووریەکان بە ئامادەبوونی حکومەت”.
