لە کۆتا کۆبوونەوەی نێوان یۆرگن کلۆپی ڕاهێنەر و بەرپرسانی یانەی لیڤەرپوڵ، بڕیاردراوە پاریزگاری لە یاریزانە گەورە و ناودارەکان بکرێت.
ڕۆژنامەی “دەیلی میرەر”ی بەریتانی بڵاویکردووەتەوە، لە کۆتا کۆبوونەوەی چارەنووسساز دەربارەی وەرزی داهاتوو و ئامادەکارییەکان، یۆرگن کلۆپی ڕاهێنەری ئەڵمانی داوای لە بەرپرسانی “ڕێدز” کردووە پاریزگاری لە بونیاد و پەیكەری پێکهاتەی تیپەكەی بکەن، ئەوەشی بە تاکە ڕێگە وەسفکردووە بۆ مانەوەیان لە ترۆپکی توانا وەرزشییەکانیان.
بەپێی سەرچاوەکە، کلۆپ نایەوێت بەرامبەر خواستی یانە گەورەکان هەریەک لە محەمەد سەڵاح و سادیۆ مانێ لەدەستبدات، بەڵکو پلانی دارشتووە هاوشانی فێرمینۆ و دیێگۆ جۆتا و چەند بۆندێکی نوێ، بۆ وەرزی داهاتوو بگەڕێتەوە لوتکەی پریمەرلیگ.
لە بەرامبەر هەڵوێستی ڕاهێنەرە ئەڵمانییەکە، جۆن هێنری و هاوڕێیانی، بەڵینیان پێداوە نەک بەتەنها دەستبەرداری یاریزانە گەورەکانیان نەبن، بەڵکو یاریزانی نوێی لە هێڵەکانی بەرگری و ناوەند بۆ دابینبکەن، لەپێناو تۆکمەکردنەوەی پێکهاتەی یانەکە بۆ وەرزی 2021/2022.
