یانەکانی ئینگلتەرا لەژێر فشاری دامەزراوە وەرزشییەکان و بەرانبەر ئیمتیازاتی دارایی، بڕیاریانداوە لە بیرۆکەی ڕێکخستنی خولی سوپەری ئەوروپی بکشێنەوە.
ڕۆژنامەکانی ئیتاڵیا پاڵپشت بە زانیارییەکانی ڕۆژنامەی موندۆ دیپۆرتیڤۆی کەتەلۆنی ئاشکرایانکردووە، دوای ئەوەی فیدراسیۆنەکانی تۆپی پێی ئەوروپا و جیهان گوشاریان لەسەر یانە دامەزرێنەرەکانی “سوپەرلیگ” دروستکردووە، سەرجەمیان تەنانەت بە یانە ئینگلیزییەکانیشەوە بەرانبەر ڕەخنەی میدیایی و فیدراسیۆنەکان یەکگرتوبوون.
موندۆ نوسیویەتی، دوای ئەوەی بەرپرسانی “یوێفا” هەستیان بە شکستی هەوڵەکانیان کردووە، ڕێگەچارەیەکی دیکەیان بەکارهێناوە بۆ چارەسەرکردنی دۆخەکە و پێشنیازی ئیمتیازاتی دارایی زیاتریان بۆ هەر شەش یانە ئینگلیزییەکە کردووە، لە خولە ناوخۆیی و ئەوروپییەکان، لێرەوە گروپی یانە دامەزرێنەرەکە لەلایەن یانە ئینگلیزییەکەوە کەلێنی تێدا دروستکراوە.
ئەم ئۆفەرەی “یوێفا” تەنها بۆ زەبەلاحەکانی ئینگلتەرابووە “یونایتد، سیتی، ئارسیناڵ، تۆتنهام، لیڤەرپوڵ، چێڵسی”، بۆیە یانەکانی ئیسپانیا و ئیتاڵیاش چاوەڕوانی هەمان هەڵوێست و ئیمتیازاتیان کردووە و پێیان نەدراوە، سەرەڕای ئەوەی لە بەهێزترینی یانەکانی ئەوروپان و پێگەیان لە یانە ئینگلیزییەکان بەرزترە.
