هاوسەرۆكی یەكێتی ڕایدەگەیەنێت، چوار ساڵ لەمەوبەر کوردستان گەنجینەیەکی گەورەی سیاسەت و نووسەرێکی لێهاتووی لەدەستدا و دەشڵێت، کۆچی دوایی هەردوو سەرکردە و خەباتگێڕ، مام جەلال و کاک نەوشیروان، بۆشاییەکی گەورەی لە کایەی سیاسیدا دروستکرد، بەڵام ڕێبازەکەیان بەردەوامە و ئەمڕۆ ئێمە درێژە بەو کاروانە دەدەین.
بافڵ تاڵەبانی، هاوسەرۆکی یەکێتیی نیشتمانیی کوردستان ئەمڕۆ چوارشەممە ڕاگەیەنراوێكی بڵاوكردەوە و دەڵێت، چوارساڵ لەمەوبەر کوردستان یەکێک لە سیمبولەکانی شۆڕشی نوێ، سەرکردەی ڕۆژانی خەبات، گەنجینەیەکی گەورەی سیاسەت و نووسەرێکی لێهاتووی لەدەستدا.
بافڵ تاڵەبانی دوپاتیكردووەتەوە، “ئەو ڕۆڵە مێژووییەی کاک نەوشیروان لە دروستبوونی یەکێتیی نیشتمانیی کوردستان و هەڵگیرسانی شۆڕشی نوێی گەلەکەماندا بینیوویەتی، بۆ هەمیشە لەیادمان دەبێت و بە ئەوپەڕی وەفادارییەوە لێی دەڕوانین، هەوڵەکانیشی لەپێناو چاکسازی و دەستەبەرکردنی ژیانێکی شایستە بۆ خەڵکی خۆشەویستی کوردستان، بەرز دەنرخێنین”.
هاوسەرۆكی یەكێتی دەشڵێت، “کۆچی دوایی هەردوو سەرکردە و خەباتگێڕ مام جەلال و کاک نەوشیروان، بۆشاییەکی گەورەی لە کایەی سیاسیدا دروستکرد، بەڵام ڕێبازەکەیان بەردەوامە و ئەمڕۆ ئێمە درێژە بەو کاروانە ئەدەین، بەڵێنی خۆمان دووپاتدەکەینەوە، کە هەڵگری مەشخەڵی خزمەتکردنی خەڵک، چاکسازی، یەکڕیزی و تەبایی دەبین، پێکهێنانی هاوپەیمانیی کوردستانیش لەنێوان یەکێتیی نیشتمانیی کوردستان و بزوتنەوەی گۆڕان بۆ هەڵبژاردنەکانی داهاتووی عێراق، هەر لەوپێناوەدا بووە، پێکەوە ھەنگاوی جدی دەنێین بە ئاراستەی یەکڕیزیی نیشتمانی، خزمەتکردنی زیاتری خەڵک و بەھێزترکردنی پێگەی ھەرێم”.
بافڵ تاڵەبانی ئاماژەشدەدات، “دەستەبەرکردنی ژیانێکی شایستە و سەربەرزی و سەرفرازیی خەڵکی قارەمانی کوردستان خەونی لەمێژینەی مام و کاکە نەوەی هاوڕێ و هاوسەنگەری بووە، بەرپرسیارێتی نەتەوەیی و مێژوویی ئێمەیە ئەو خەونە بهێنینەدی و پێشکەشی رۆحی ئەو دوو سەرکردە قارەمانە و سەرجەم ئەو شەهیدانە بکەین، کە خوێنیان بەخشییە خاکی پیرۆزی کوردستان”.
