بافڵ جەلال تاڵەبانی رایگەیاند، هەوڵەکانیان لەو چوارچێوەیەدایە بگەن بە حکومەتێکی خزمەتگوزاری نیشتمانی کە بنەماکەی هاوبەشێتی و پێکەوەیی بێت.
ئەمڕۆ چوارشەممە بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە پاتریک دۆرێل، باڵیۆزی فەرەنسا لە عێراق کرد.
لە دیدارێکدا دۆخی گشتیی هەرێمی کوردستان، عێراق و ناوچەکە تاوتوێکران و جەخت لە بەردەوامی لێکتێگەیشتنی نێوان لایەنەکان بۆ زاڵبوون بەسەر ئاڵنگارییەکاندا کرایەوە.
هەر لە دیدارەکەدا و پەیوەست بە پێشهاتە سیاسییەکان لە دوای هەڵبژاردنی ئەنجومەنی نوێنەرانی عێراق بۆچوون ئاڵوگۆڕکرا و بافڵ جەلال تاڵەبانی رایگەیاند، “هەوڵەکانمان لەو چوارچێوەیەدایە بگەین بە حکومەتێکی خزمەتگوزاری نیشتمانی کە بنەماکەی هاوبەشێتی و پێکەوەیی بێت”.
