ئێوارەی ئەمڕۆ لە شاری هەولێر، شۆفێرێکی تانکەر کە منداڵێک بووە، کۆنترۆڵی ئۆتۆمبیلەکەی لە دەستداوە و کرێکارێکی وڵاتی بەنگلادیشی شێلاوە، هەر لەوێدا کرێکارەکە گیانیلەدەستداوە.
لەسەر ڕووداوەکە بەڕێوەبەرایەتیی هاتوچۆی هەولێر ئاشکرایکردووە، “لە شەقامی 120 مەتری لە نزیک دەروازەی فڕۆکەخانە، تانکەرێکی ئاو کە منداڵێک شۆفێری بووە، بەهۆی تیژڕەوییەوە کۆنترۆڵی لە دەستداوە و کرێکارێکی ژینگەپارێزیش لەوکاتەدا سەرقاڵی کارەکەی بووە، بەڵام منداڵەکە شێلاویەتی و لە شوێنی ڕووداوەکە کرێکارەکە گیانیلەدەستداوە”.
هاتوچۆی هەولێر داوای سەپاندنی سزای یاسایی توند بەسەر بەخێوکەری منداڵەکەدا دەکات، کە چۆن ڕێگەیداوە ئەو منداڵە، تەمەنی شیاو نییە بۆ شۆفێری، تانکەری پڕ لە ئاو بگوازێتەوە”.
بەهۆی بوونی کرێکارانی بیانی لە هەرێمی کوردستان، بەتایبەت کرێکارانی ڕۆژهەڵاتی ئاسیا و ئەفریقا، لە ڕووداوی جیاجیادا کرێکاران لە هەرێم گیانلەدەستدەدەن، دواتریش بەهۆی لاوازی و هەژاری وڵاتەکەیانەوە بردنەوەی تەرمی کرێکارەکان زۆر دەخایەنێت و زۆرجار کرێکارە بیانییەکان لە هەرێم دەنێژرێن.
