وەزارەتی دەرەوەی عێراق سەرکۆنەی هێرشی سەر نوێژخوێنانی فەڵەستین دەكات لە مزگەوتی ئەقسا، كە لەلایەن سەربازانی ئیسرائیلەوە ئەنجامدرا، بەهۆیەوە 200 هاوڵاتی فەڵەستینی برینداربوون.
لە بەیاننامەیەكدا ئەحمەد سەحاف، وتەبێژی وەزارەتی دەرەوەی عێراق، كە ئەمڕۆ شەممە 8ی ئایار بڵاویکردووەتەوە دەڵێت، “حکومەتی عێراق سەرکۆنەی پەلاماردانی هێزەکانی ئیسرائیل دەکات، بۆ سەر مزگەوتی ئەقسا و ئەنجامدانی کردەوەی ترس و تۆقاندن لە نوێژخوێنانی فەڵەستینی”.
ئاماژەی بەوەشكردووە، گەلی عێراق هاوسۆزە لەگەڵ خەڵکی قودس و داوای راگرتنی ئەو پەلامارە دوژمنکارانە دەکات.
بەیاننامەكەی وەزارەتی دەرەوەی عێراق لە كاتێكدایە، لە شەڕ و پێکدادانی نێوان پۆلیسی ئیسرائیل و چەند گەنجێكی فەلەستینی لە قودس زیاتر لە 200 فەلەستینی و 17 پۆلیسی ئیسرائیل برینداربوون.
بەپێی هەواڵێكی ئاژانسی رۆیتەرز، هۆكاری شەڕەكە، دوێنی دوایین هەینی ڕەمەزان بووە، بەوهۆیەوە بە هەزاران گەنی فەڵەستینی چوونە مزگەوتی ئەقسا بۆ نوێژکردن، دواتر بەشێکیان ماونەتەوە و دەستیان بە خۆپێشاندان کردووە دژی کێشەکانی نێوان ئیسرائیل و فەڵەستین.
