ئەنجومەنی وەزیرانی عێراق بڕیاریدا قەدەغەی گشتیی هاتوچۆ بۆ ماوەی 10 ڕۆژ جێبەجێبكرێت.
نوسینگەی ڕاگەیاندنی سەرۆك وەزیرانی عێراق ئەمڕۆ سێشەممە لە بەیاننامەیەكدا ڕایگەیاند، ئەنجومەنی وەزیران لە كۆبوونەوەی ئەمڕۆیدا ڕەزامەندیدا لەسەر پێشنیارێكی لیژنەی باڵای تەندروستی و سەلامەتیی نیشتیمانی بە سەپاندنی قەدەغەی گشتیی هاتوچۆ بۆ ماوەی 10 ڕۆژ، لە 12ی ئایارەوە بۆ 22ی ئایاری 2021.
ئاشكراشیكرد، بڕیارەكە بۆ سنووردانانە بۆ بڵاوبوونەوەی پەتای كۆرۆنا و جێبەجێكردنی ڕێوشوێنەكانی خۆپارێزی لەڕێی دووركەوتنەوەی كۆمەڵایەتی و مەرجە خۆپارێزییەكانی دیكە، بەتایبەتی دوای ئەوەی بەمدواییە وەزارەتی تەندروستی زیادبوونی ژمارەی توشبووانی لە سەرتاسەری عێراق تۆماركرد.
نوسینگەی ڕاگەیاندنی سەرۆك وەزیران ڕونیشیكردوەتەوە، بڕیاری قەدەغەی هاتوچۆ داخستنی مۆڵ و چێشتخانە و كافتریا و قاوەخانە و هۆڵەكانی سینەما و كاتبەسەربردن و هۆڵی بۆنەكان و هاوسەرگیری و مەلەوانگە و هۆڵەكانی وەرزش دەگرێتەوە، سەرەڕای ڕێگری لە كۆبوونەوەی مرۆیی بە سەرجەم جۆرەكانیەوە.
هەفتەی ڕابردووش لیژنەی باڵای بەرەنگاربوونەوەی كۆرۆنا لە هەرێم قەدەغەی گشتیی هاتوچۆی لە ڕۆژانی جەژن ڕاگەیاند.
