سەرۆکی یانەی پاریس سان جێرمان، ناسڕ خلێفی بۆندێکی خەیاڵی پێشکەشی لیۆ میسی ئەفسانەی یانەی بەرشلۆنە کردووە، بەنیازن بە گواستنەوەی کریستیانۆ ڕۆناڵدۆ کۆتایی بە پڕۆژە گەورەکەیان لە خولی فەرەنسا بهێنن.
کەناڵی کواترۆی ئیسپانی ئاشکرایکردووە، کە کریستیانۆ ڕۆناڵدۆی پۆرتوگالی لە یوڤانتۆس بەختەوەر نییە، خەونی گەڕانەوە بووە بۆ یانەی شاهانەی مەدرید، بەڵام ئەو چانسەی لەدەستداوە و حاڵی حازر چانسی گەڕانەوە بۆ مانچستەر یونایتد یاخود یانەی پاریس سان جێرمانی لەبەردەمدا ماوە.
ئەم زانیارییانەش گەیشتوونەتەوە بە ناسڕ خلێفی و شێخانی قەتەر، سەرەڕای ئەوەی تاوەکو ئێستا هیچ بۆندێکی فەرمییان بۆ گواستنەوەی پێشکەشنەکردووە، بەڵام بە نیازن ئەو هەنگاوە بنێن.
هەموو ئەمانەش لە کاتێکدایە، کە ئۆفەریان پێشکەشی لیۆ مێسی کردووە بە چەندین ئیمتیاز و بۆندی خەیاڵییەوە.
بەپێی سەرچاوە ئیسپانیەکە، خەونی شێخ ناسڕ خلێفی کۆکردنەوەی مێسی و کریستیانۆیە هاوشانی نێیمار لە یەک پێکهاتەدا، تاوەکو نازناوی خولی یانە پاڵەوانەکان بەدەستبهێنن. ئامانجی گەورەتریشی بەکارهێنانی ئەو سێ ناوە گەورەیە وەک ڕوخساری مۆندیالی 2022 کە لە وڵاتی قەتەر سازدەکرێت، لەم ڕێگەیەوە کاریگەری لەسەر شەقامی وەرزشیی جیهانیی دروستدەکات.
لە بەرامبەردا ئامادەیی نیشاندەدەن کیلیان مباپێی فەرەنسی بە یانەی ڕیاڵ مەدرید بفرۆشن، چونکە ناوبراو تاوەکو ئێستا چوار ئۆفەری بۆ نوێکردنەوەی بۆندەکەی ڕەتکردووەتەوە، لە ئەگەری گواستنەوەی مێسی و کریستیانۆشدا دەرفەتی یاریکردن لەدەستدەدات.
