ڕاهێنەری هەڵبژاردەی ئەڵمانیا، یواکیم لۆوڤ لە بەکارخستنی سیستمی گەنجکردنەوەی پێکهاتەکانی ڕازی نییە و بڕیاریداوە یاریزانە ئەزمووندارەکانی بایرن میونشن بانگهێشتبکات.
گۆڤاری “فرانس فوتباڵ”ی فەرەنسی ڕاپۆرتێکی لەبارەی هەڵبژاردەی ئەڵمانیا و چانسی بەشداریکردنیان لە جامی نەتەوەکانی ئەوروپای 2021 بڵاوکردووەتەوە.
سەرچاوەکە ئاماژەیکردووە، پێکهاتەی “دای مانشافت” بەهۆی دوورخستنەوەی یاریزانە ئەزمووندارەکانەوە دەناڵێنێت، لە بەرامبەردا لاوانی وڵاتەکە لە 2018وە نەیانتوانیوە کەلێنی چەندینێکی وەک مولەر و ئوزێل و بواتینگ پڕبکەنەوە.
دوای دروستبوونی فشاری خنکێنەر لەسەر یواکیم لۆوڤ و ستافەکەی، بڕیاردراوە لە هاوینی 2021 بە پێکهاتەیەکی جیاوازەوە بەشداری یورۆ بکەن، تیایدا هەردوو یاریزانی ناودار، تۆماس مولەر و جیروم بواتینگ بوونیان دەبێت.
پێکهاتەی نوێی ئەڵمانیا کۆی هەشت یاریزانی بایرن لەخۆدەگرێت (سولی، گۆرێتسکا، سانێ، گنابری، موسیالا، مولەر، بواتینگ، نۆیەر)، کە ئەوەش دووبارەبوونەوەی هەمان سینارۆی ساڵانی 2013 و 2014یە کە هەڵبژاردەکە نازناوی مۆندیالی بەدەستهێناوە.
فرانس فوتباڵ نوسیویەتی، شارەزایانی فیدراسیۆنی تۆپی پێی ئەڵمانیا پێیان وایە، لۆوڤ بەم هەنگاوە کارێکی باشدەکات، بەوپێیەی هەرکاتێک بایرن باڵادەستبێت هەڵبژاردەی وڵاتەکەشیان باڵادەستدەبێت.
