بەگوێرەی ئامارەكان، عێراق ڕیزبەندی یەكەمی ئەو وڵاتانەی گرتووە كە زۆرترین خۆراكی پاقلەمەنی لە توركیاوە هاوردە كردووە لە ئەمساڵدا.
ئەمڕۆ شەممە 17ی نیسان، حسێن ئەرسەلان، سەرۆكی كۆمەڵەی سەرچاوەكانی دانەوێڵە و پاقلەمەنیی توركیا بە ئاژانسی ئانادۆڵوی توركی وتووە، “توركیا بە بەهای 353 ملیۆن و 400 هەزار دۆلار دانەوێڵە و پاقلەمەنی هەناردەی وڵاتان كردووە لە چارەكی یەكەمی ئەمساڵدا”.
ئەوەشی ئاشكراكردووە، ڕێژەی هەناردەی ئەو خۆراكانە بۆ دەرەوەی توركیا بە ڕێژەی 21% زیادی كردووە.
سەرۆكی كۆمەڵەكە ئاماژەی بەوەشكردووە، “زۆربەی ئەو خۆراكانە هەناردەی عێراق كراون، دواتر سوریا و ئەڵمانیا”.
بەوەش عێراق بە هەرێمی كوردستانیشەوە، ڕیزبەندی یەكەمی وڵاتانی گرتووە لەڕووی هاوردەی خۆراكی پاقلەمەنی و دانەوێڵەی توركیاوە، كە بەهاكەی 59 ملیۆن و 500 هەزار دۆلار بووە.
