ناوەندی دەنگ و ڕەنگی ئێران بڵاویکردەوە ئەو کەسەی کە تەقینەوەکەی لە سیستمی کارەبایی بنکەی ئەتۆمی نەتەنزدا ئەنجامداوە ئاشکرا بووە و وێنەکەی دراوەتە پۆلیسی ئینتەرپوڵ بۆ دەستگیرکردنی.
میدیای کۆماری ئیسلامی ئێران ڕاشیگەیاندووە، “ئەو کەسەی کە تەقینەوەکەی ئەنجامداوە ناوی (ڕەزا کەریمی)یە و وێنە و ڤیدیۆی لەلایەن هێزە ئەمنییەکانەوە بڵاوکراوەتەوە”.
ئەو کەسەی کە ئێران تۆمەتباری کردووە بە ئەنجامدانی تەقینەوەکە بە پێی وتەی میدیا ئێرانییەکان وڵاتی جێهێشتووە و لە سنوری ئەو وڵاتەدا نەماوەتەوە.
دوای تەقینەوە لە سیستمی کارەبایی بنکەی ئەتۆمی نەتەنز لە نزیک شاری ئەسفەهان، ئێران دەستی تۆمەتی بۆ ئیسرائیل درێژکرد و ڕایگەیاند کە کردەوەکە کردەوەیەکی تیرۆرستی بووە.
بە پێی زانیارییەکانی میدیا ئێرانییەکان تەقینەوەکە لە بەشی گەیاندنی کارەبای بنکە ئەتۆمییەکەدا ڕویداوە و بەهۆیەوە زیانی گەورە بەر پڕۆسەی پیتاندن و پاکسازی کەوتووە.
