ئێران بەڵێنی تۆڵەکردنەوە لە ئیسرائیل دەدات

وەزیری دەرەوەی ئێران ڕایگەیاند، ئیسرائیل دەیەوێت تۆڵەی هەوڵە سەرکەوتووەکانی ئێران لەبارەی هەڵوەشاندنەوەی سزاکانی لە خەڵكی ئێران بکاتەوە، بەڵام ئەوان ڕێگە بەوە نادەن.

محەمەد جەواد زەریف، وەزیری دەرەوەی ئێران ئەمڕۆ 12ی نیسان لە لێدوانێکی ڕۆژنامەوانیدا ڕایگەیاند، “دانیشتنەکان لەبارەی هەڵوەشاندنەوەی سزاکانی سەر ئێران پێشکەوتنی بەخۆیەوە بینیووە، بەڵام ئەمە بە ئیسرائیل قبوڵ ناکرێت و هەوڵی تۆڵە سەندنەوەی ئەو شکستە لە ئێرانییەکان دەدات”.

وەزیری دەرەوەی ئێران ئاماژەی بەوەکردووە، “هێرشکردنە سەر بنکەی ئەتۆمی نەتەنز، ئێران لە دانوستانەکاندا لاواز ناکات، بەڵکو ئێستا بنکەی نەتەنز دەتوانێت زیاتر لە چاران چالاک بێت و کارەکانی خۆی بەپێی بەرنامە بباتە پێشەوە”.

محەمەد جەواد زەریف، بەڵێنی تۆڵەکردنەوە لە ئیسرائیلییەکان دەدات و دەڵێت، “ئیسرائیل دەیەوێت خەڵکی لەوە تێبگەیەنێت کە دەستی کراوەیە، بەڵام ئێمە پێشکەوتن لەسەرخۆ لە دانوستانەکان و بنکە ئەتۆمییەکان پێشکەشی خەڵکی خۆمان دەکەین”.

پێشتر رۆژنامەی نیویۆرک تایمز لە زاری دوو بەرپرسی ئێرانی ئاشکرایکردبوو، هێرشە ئەلیکترۆنییەکە کە کراوەتە سەر بنکەی ئەتۆمی نەتەنز بووەتە هۆی چەند تەقینەوەیەک و سیستمی ئەلیکترۆنی بنکە ئەتۆمییەکەی تێکداوە، دواتر ئەم هەوڵە لەلایەن ئێرانەوە خرایە ئەستۆی ئیسرائیل.

بابەتی پێشتر

وەزارەتی پەروەردە دەستپێکردنەوەی خوێندنی ڕاگەیاند

بابەتی دواتر

"ڕێوی گواستنەوەکان" یاری بەهەموو یانەکان کردووە و داوای مەحاڵ دەکات

بابەتی پەیوەندیدار
Total
8
Share