مامۆستایانی ناڕازی له ڕاگه‌یه‌ندراوێكدا داوا لە سەرجەم مامۆستایان ده‌كه‌ن، پابەندی هیچ جۆرە خوێندنێک نەبن و بایکۆتی خوێندنی ئەلیکترۆنی و ناو خوێندنگە بکەن.
ئه‌وه‌شیان خستوه‌ته‌ڕوو، “بەداخەوە وەزارەتی پەروەردە و وەزیرەکەی بیر لە بینا و دار و بەرد و قەڵەم و دەفتەر دەکاتەوە، بەڵام مامۆستایان وەکو پێکهێنەری سەرەکی پەروەردە پشت گوێ دەخەن و گوێ بۆ داواڕەواکانیان ناگرن، وەزارەتی پەروەردە نایەوێ پرۆسەی پەروەردە بەشێوەیەکی تەندروست بەڕێوە بچێت، تەنها دەیەوێت لە ڕووی دەزگا ڕاگەیاندنەکان بڵێ دەرگای خوێندنگاکان کراونەتەوە و پرۆسەی خوێندنی ئەلکترۆیمان هەیە، ئەگەر نا لە شارەکانی هەولێر و دهۆکیش بایکۆتێکی ڕانەگەیەنراو هەیە و زۆربەی قوتابیان و مامۆستایان پابەندی خوێندنی ئەلیکترۆنی نابن و پەیڕەوی ناکەن”.
مامۆستایانی ناڕازی ئاماژه‌یان به‌وه كردووه، “ئەگەر بەهۆکاری نەخۆشی کۆرۆناوە دەرگای خوێندنگاکان داخراون پێویستە خولەکانی پەیمانگاکان و خوێندنگە ئەهلییەکانیش دابخرێن، پشتیوانیی هەڵوێستی ئەو لقانەی یەکێتیی مامۆستایان و ئەو بەڕێوبەرانەش دەکەین کە بڕیاری بایکۆتیان داوە، هیوادارین تا وەڵامدانەوەی داوا ڕەواکانی مامۆستایان لەلایەن دەسەڵاتەوە بەردەوام بن، داواکارین لە سەرجەم مامۆستایان پابەندی هیچ جۆرە خوێندنێک نەبن و بایکۆتی خوێندنی ئەلیکترۆنی و ناو خوێندنگە بکەن، تا ئەوساتەی دەسەڵاتدارانی هەرێم وەڵامی داواکاری مامۆستایان دەدەنەوە”.
