لێپرسراوی کارەکانی داڤید ئالابا، پینی زاهاڤی ئاشکرایدەکات کە ڕیاڵ مەدرید و بەرشلۆنە لە پێشەنگی ئەو یانانەدان خواستیان لەسەر یاریزانەکە نیشانداوە.
زاهاڤی لە چاوپێکەوتنێکدا بە گۆڤاری کیکەری ئەڵمانی ڕاگەیاندووە، ” تاوەکو ئێستا لەگەڵ یانە داواکارەکان لە دانوستاندنداین، هیچ وادەیەکمان بۆ کۆتاییهاتنی گفتوگۆکان دیارینەکردووە، یانەکانی ئیسپانیا لە پێشەنگدان، بەڵام ئێمە دەرگامان لە هیچ یانەیەکی دیکە دانەخستووە”.
لێپرسراوە ناودارەکە زیاتر دەدەوێت و گومانەکان قوڵتر دەکاتەوە و دەڵێت، ” لە کۆتاییدا ئالابا بڕیاردەدات و یانەی داهاتووی یەکلاییدەکاتەوە، مەرج نییە ئەوەی پێشەنگ بێت براوەی دانوستاندنەکان بێت”.
بەبۆچوونی میدیاکان، لێدوانەکانی زاهاڤی دەریدەخەن کە ڕیاڵ مەدرید هەنگاوێک پێش یانەکانی دیکە کەوتووە و نزیکن لە قایلکردنی یاریزانەکەوە، لەهەمان کاتدا یانەی بەرشلۆنە ململانێکارە و هەوڵەکانیان بەردەوامە، هەروەها یانەکانی چێڵسی و پاریس سانت جێرمان سەرەڕای کشانەوەیان لە گفتوگۆکردن، بەڵام هیشتا چانسیان بەهێزە بۆ گەڕانەوە و یەکلاکردنەوەی گرێبەستەکە.
ئالابا لە گواستنەوەکانی زستانی 2021وە و دوای 13 ساڵ ڕۆیشتنی لە یانەی بایرن میونشن ڕاگەیاند، بۆ ئەم مەبەستەش یانەکانی ڕیاڵ مەدرید و بەرشلۆنە و چێڵسی و پاریس سانت جێرمان و مانچستەر یونایتد خواستیان لەسەر تواناکانی نیشانداوە.
