ئیدارەی نوێی یانەی بەرشلۆنە بە سەرپەرشتی خوان لاپۆرتا ناچاردەبێت لە گواستنەوەکانی هاوینی 2021 داهاتووی دووان لە یاریزانە گرنگەکان یەکلاییبکەنەوە.
ڕۆژنامەی ئاسی ئیسپانی ڕاپۆرتیكی دەربارەی پڕۆژەکانی خوان لاپۆرتا لە یانەی بەرشلۆنە و ئەو گۆڕانکارییانە بڵاوکردووەتەوە، کە تایبەتن بە گواستنەوەکانی هاوینی 2021.
بەپێی سەرچاوەکە، دوای گۆڕینی پلانی یاریکردن لە 4-3-3 بۆ 4-3-2-1 لەلایەن ڕۆناڵد کومانی ڕاهێنەرەوە، ئەنتوان گریزمان کەوتووەتە دۆخێکی قورسەوە و پێدەچێت لە کۆتایی وەرزدا ماڵئاوایی بکات.
یەکێک لە هەوڵەکانی ئیدارەی ئازولگرانا بۆ نوێکردنەوەی بۆندی لیۆ مێسی-یە، عوسمان دیمبیلی گەڕاوەتەوە سەر توانا هونەرییە ناوازەکەیی و یانەکە خاوەنی ترینکاو و کۆتینیۆیە، لە داهاتووشدا ئانسو فاتی دەگەڕێتەوە، هەموو ئەمانەش وا دەکەن لاپۆرتا و هاوڕێیانی بیر لە فرۆشتنی گریزمان بکەنەوە.
یەکێکی دیکە لە یاریزانە کێشە لەسەرەکان ڕیکی پوجی ئەستێرەی هەڵکشاوی لاماسیایە کە ئاستێکی ناوازەی پێشکەشکردووە، بەڵام لەگەڵ بوونی پێدری و بوسکێتس و دی یۆنگ وەک یاریزانانی سەرەکی و ئیلیاکس مۆریبا و میرالیم پیانیچ وەک یەدەگ لەهەمان پێگەدا داهاتووی پوج ناڕوونە.
تەنانەت ئیدارەی نوێ هەوڵەکانی بۆ کڕینی جۆرجینیۆ ڤایناڵدومی هۆڵەندی دەستپێکردووە و ئەم هەوڵەش وا دەکات پوج لە پێکهاتەکانی کومان جێگەی نەبێتەوە.
