سەرچاوەکانی هەواڵ ئاماژەیانکردووە، کە لیژنەی جێبەجێکاری سەر بە فیدراسیۆنی تۆپی پێی ئەوروپا ئامادەکاری دەکات بۆ بەگەڕخستنی سیستمی نوێی خولی یانە پاڵەوانەکانی ئەوروپا.
بەپێی زانیارییەکانی ماڵپەڕی ” زە ئەتلەتیک”، لیژنەی جێبەجێکاری فیدراسیۆنی تۆپی پێی ئەوروپا لەم هەفتەیەدا ڕەزامەندی بەرانبەر بەکارخستنی سیستمی نوێی خولی یانە پاڵەوانەکانی ئەوروپا نیشاندەدات.
بڕیارە چوارشەممەی داهاتوو، لیژنەی جێبەجێکار کۆبوونەوەی یەکلاکەرەوە ئەنجامبدەن، لە کۆبوونەوەکەدا بڕیاردەدرێت لە وەرزی 2024/2025وە خولی یانە پاڵەوانەکانی ئەوروپا بە سیستمی سویسری ئەنجامبدرێت.
بەپێی سیستمە نوێیەکە، ژمارەی یانە بەشدارەکان لە 32 یان بۆ 36 زیاد دەکرێت و قۆناغی کۆمەڵەکان بەتەواوی هەڵدەوەشێتەوە، بەڵکو هەموو یانەکان لە یەک کۆمەڵەدا دەبن و هەر یانەیەک 10 یاری ئەنجامدەدات.
بۆ گەیشتن بە قۆناغە یەکلاکەرەوەکان (قۆناغی 16)، یانەکان پێویستیان بە کۆکردنەوەی زۆرترین ڕێژەی خاڵ دەبێت و نۆ یانەی یەکەمی گروپەکە ڕاستەوخۆ دەگەن بە قۆناغی 16، یانەکانی پلەی دەیەم تاوەکو 24 یارییە یەکلاکەرەوەکان ئەنجامدەدەن بۆ گەیشتن بەهەمان قۆناغ.
ژمارەی ڕوبەڕوبوونەوەکان لە یەک وەرزی چامپیۆنزلیگ لە ئێستادا 125 یارییە، بەڵام بەپێی سیستمی سویسری ڕێژەکە بۆ 225 یاری بەرزدەبێتەوە.
