پۆلیسی سلێمانی ئاشكرایكردووە، كەسێك دەستگیركراوە كە تۆمەتبارە بەوەی “تەقەی لە باوكی خۆی كردووە و هەڵهاتووە”.
لە ڕاگەیەندراوێكدا پۆلیسی سلێمانی ئەمڕۆ پێنجشەممە 25ی ئازار، ڕایگەیاندووە، “دوای ئەوەی شەوی ڕابردوو زانیاری گەیشتە هێزەكانی پۆلیس كە كێشەیەك لەماڵێكدا هەیە، مەفرەزەكانی بەشی پۆلیسی فریاكەوتنی سلێمانی دەستیان بە لێكۆڵینەوە كرد و گەیشتنە شوێنی مەبەست”.
پۆلیسی سلێمانی ئەوەشی خستوەتەڕوو، “دەركەوت كە كوڕێك تەقەی لە باوكی كردووە و هەڵهاتووە” .
ئاماژە بەوەشكراوە، “پۆلیسی فریاكەوتن گەڕان و بەدواداچوونەكانی دەستپێكرد و توانرا لە ماوەیەكی كەمدا تۆمەتبار دەستگیربكرێت و لەكاتی دەستگیركردنیشیدا دەستگیرا بەسەر دوو تاپرداكە بە تۆمەتبارەكە بووە”.
“تۆمەتبارەكە لەدایكبووی ساڵی 1988ە و فیشەكێكی بە چەكی جۆری تاپڕ بە باوكییەوە ناوە، بە بڕیاری دادوەر ڕاگیراوە و لەلایەن بنكەی پۆلیسی ئازادییەوە پەڕاوی لێكۆڵینەوەی بۆكراوەتەوە”، وەك پۆلیسی سلێمانی ئاماژەی پێكردووە.
لەئێستادا باوكی تۆمەتبارەكە بریندارە و لە نەخۆشخانە لەژێر چاودێریی پزیشكیدایە، بەگوێرەی زانیارییەكانی پۆلیس.
