وتەبێژی كۆمەڵی دادگەری سەرسوڕمانی لەبارەی قسە و هەوڵەكانی پارتی بۆ یەكخستنی ناو ماڵی سوننە و شیعە دەردەبڕێت، لەكاتێكدا كورد بە پەرتەوازەیی بەرەو بەغداد دەچێت.
محەمەد حەكیم، وتەبێژی كۆمەڵی دادگەریی كوردستان لە نووسینێكدا لە تۆڕی كۆمەڵایەتیی فەیسبووك، لەژێر ناوی (كورد چی دەكات!) دەڵێت، “سەیرە ماڵی خۆت پەرتەوازە بێت، باس لە دەستکەوتی یەکخستنی ماڵی سوننەکان و دەستپێشخەری بۆ یەکخستنی ماڵی شیعە بکەیت”.
ئەو پەیامەی بەرپرسەكەی كۆمەڵ لەكاتێكدایە ئەمڕۆ مەسعود بارزانی، سەرۆكی پارتی دیموكراتی كوردستان دەستپێشخەرییەكی بۆ یەكخستنی نێوماڵی شیعە و لێكنزیككردنەوەی هەردوو بەرەی سەدر و چێوەی هەماهەنگی شیعەكان ڕاگەیاند.
بەرپرسانی پارتیش وەك دەستكەوتێك ئاماژەیان بەوەدا كە پارتی و بارزانی، دوای یەكخستنی سوننەكان هەوڵ بۆ یەكخستنی شیعە لە پێكهێنانی حكومەتی ئایندە دەدات.
ئەمەش لەكاتێكدایە، بەهۆی ڕێككەوتنی پێشوەختە و نهێنیی پارتی لەگەڵ سەدر و سوننەكان، سووربوون لەسەر وەرگرتنی پۆستی سەرۆك كۆمار، نێوماڵی كورد پەرتەوازەیە و بەهۆیەوە پارتی و یەكێتیی نیشتمانیی كوردستان دوو كاندیدیان بۆ پۆستی سەرۆك كۆمار پێشكەشكردووە.
